المرتب

السلام عليكم كيف الحال؟ عساكم جميعا طيبين ان شاء الله تعرفوا ان القبض يوم 6-5 ان شاء الله؟ المفروض نقبض شهرين مع بعض (مارس- ابريل) بس زي ما انتم عارفين مرتب الشهرين يادوب تكمل عليه و تجيب كارت شحن
، لو كفى يعني!! كام بقى؟ المفروض اللي بره قصر العيني بيقبض 233 جندي بالتمام و الكمال و اللي جوه القصر يخصم منه 5 جنيه للتأمين الصحي و مش فاهم الحتة دي قوي، يقولك عشان لما تيجي تاخد اجازة مرضي مش عارف ايه اللي بيحصل كده، المهم بيتخصم 5 جندي و خلاص و يبقى المرتب 228 جندي الجدير بالذكر ان السنة اللي فاتت كانوا بيقبضوا اكتر من كده يعني المرتب كان يعمله 254 للي جوه، و 259 للي بره انا سألت هو المرتب قل و لا ايه؟ قالك لأ,,, هما كانوا بيقبضوا زيادة بالغلط، عشان من ست سبع شهور كده جت علاوة 30% و اللي حسبها حسب غلط و الناس كانت بتقبض اكتر من المفروض لغاية ما جه الجهاز المركزي للمحاسبات راجع. بلد أي كلام و الله.. أي كلام بيتقال و أي حاجة بتتعمل،،، ما علينا ، لا تعليق و تحيا الجهاز المركزي و تحيا الحسابات. أمال ايه بقى حكاية العلاوات دي يعني ايه بقى؟ طيب مدام سألت اقولك بقى الحقيقة المسخرة سعادة معالي سيادتك متخرج ببكالوريوس، يعني مستوظف عند الحكومة على الدرجة الثالثة. أي مرتب بيبقى فيه حاجة اسمها اساسي المرتب، و بعدين عليه شوية حاجات تاني بيزودا المرتب. أساسي مرتبك (الدرجة الثالثة) 48 جنيه اه 48 ،، ث م ا ن ي ة و ا ر ب ع يييين يعني جنيه و 60 قرش في اليوم يعني لما تيجي تدي سايس الجراج جنيه، و يقولك جنيه تاني يا بيه، قوله انت اللي بيه، ده اكتر من مرتبي في اليوم يافندم.. و بعدين بقى ييجي الريس في عيد العمال كل سنة، و يقول احنا هنزود الموظفين علاوة عشرة في المية أو عشرين أو ثلاثين، تروح تتحسب على الأساسي و تزيد و بعدين فيه حاجة اسمها بدلات، زي مثلا هتلاقي عندنا حاجة اسمها بدل تغذية 8 جنيه (في الشهر مش في الوجبة) مفيش بعد كده بقى مالكش حجة، الحكومة بتديك مرتب و كمان بتأكلك، لأ كده دلع على الاخر خالص خالص خالص أهو هاديكم دلوقت مفردات المرتب تقروها براحتكم، هتلاقي مربعين فوق على الشمال بادئين من ال48 جنيه الاساسي، و متضاف عليه العلاوات من سنة 87 لسنة 2007 لغاية ما يوصلوا 148 جنيه، و شوية حاجات متضافة في الجدول و شوية حاجات مخصومة من المرتب (71 جنيه) متفصلين في الخانة اللي على الشمال دي، هتلاقي حاجات محطوطة و مخصومة تاني متفهمش ليه يعني، حصة الحكومة و حصة الموظف، مش عارف مين الموظف ده بس ما علينا. هو غالبا يعني الحاجات اللي بتتخصم من مرتب الموظفين بتبقى عشان ياخدوها لما يطلعوا على المعاش على حسب ما انا فاهم يعني برضه ما علينا،، الموضوع مش مستاهل ده كله، المهم انهم 228 جنيه. نقطة نسألكم الدعاء و دمتم على فكرة اللي جوه القصر و اللي بره كلهم بيقبضوا من القصر و مكان القبض كالتالي: تطلع من السلم اللي بعد قسم 5 تطلع دور واحد هتلاقي الخزنة في الوش مع انه حاجة تكسف بس يلا و دي المفردات http://www.2shared.com/file/5493375/c0894318/__2008_.html

نبذة dr3mro
Just a googler

التعليقات مغلقة.

%d مدونون معجبون بهذه: