معلومات عن الادارات الصحية في ج.م.ع – الجزء الثاني

ده تنقيح الجزء الأول اللي في الرابط ده فيه معلومات أكتر متقسمة على كل محافظة

منقول من جروب على الفيسبوك (بتصرف )

محافظة مطروح

فهي كالتالي من الاقرب الي الاسكندريه الي الابعد
1-الحمام66كم من الاسكندريه حوالي 30 دقيقه علي الطريق الساحلي
2-العلمين 106 من الاسكندريه حوالي ساعه وربع
3-الضبعه157كم من الاسكندريه حوالي ساعتين الا ربع
4-راس الحكمه ساعتين ونصف الي 3 ساعات
4-مرسي مطروح(العاصمه)280كم حوالي 3 ساعات الي 3 ونصف
5-سيدي براني حوالي 4 وربع
6- السلوم حوالي 5ساعات وربع
7-سيوه حوالي 7 ساعات

تصل الحوافز في بعض الوحدات الي 600%+البدلات الاخري

إدارة الحمام

دكتورة زميلتنا بتقول عليها كويسه جدا مستشفى . شغلها 3 أيام والباقى راحة والسكن كويس وكانت مرتاحة جدا فيها والفلوس كانت بتاخدها بانتظام لكن مشكلتها الوحيدة الاخلاء الاخلاء هناك صعبة جدا وهى ماعملتش اخلاء غير بكتب كتابها

محافظة بني سويف

اقرب محافظات الصعيد الي القاهرة(ساعن ونصف الي ساعتين بالقطار او الميكروباز) عموما المواصلات سهله لكن لو هتقضيها قطر يبقي احجز قبل سفرك بيوم ع الاقل الميكروبازات 24 ساعه من والي القاهرة

الادارات من الشمال الي الجنوب

الواسطي: واحده من أسوأ الادارات سواء من حيث اهل الواسطي نفسها اللي غاويين مشاكل ومبيحبوش الاغراب بشكل عام …انتهاءا الي التفاتيش والفلوس اللي بتتخصم ولو مخصموش يبقي ع الاقل الفلوس هتتأخر اوى و الوحدات فيها كتير بعيد يعني هتركب مواصلتين ده اساسي الي الواسطي ومنها الي مكان وحدتك

ناصـــــــــــــــر: بينها وبين مدينه بني سويف نفسها اقل من عشرين دقيقه اهلها عموما طيبين …بس فيها وحدات بيتعدى لها بمعديه وجو كده الادارة هناك مش وحشه متوسطه لا هي زى بني سويف ولا وشحه زى الواسطي والفشن

بني سويـــــــــف نفسها: احسن الادارات علي الاطلاق (رغم ان مدير ادارتها احيانا بيتقومله شعره كده بس بجد طيب وبيعدى) مشكلتها التفتيش كتير سواء من الادارة نفسها او المديريه واحيانا المحافظه كمان الوحدات مجهزة كلها وممتازة واللي عاوز يقضيها برايفت هيعيييييييييييييييييييش عادى جدا انك تبقي بتيجي تلات اربه ايام في الاسبوع المهم محدش يشتكي منك وتظبط امورك لو اكتر من واحد في الوحده يبقي فل جدا هتعيييييييييييشوا الفلوس كويسه جدا واقل الادارات في تأخير الفلوس  المواصلات الي جميع الوحدات سهله وابعد وحده تبعد نص ساعه عن المدينه ودى استثناء رهيييييييييب يعني

اهناسيا: اقرب مركز الي المدينه نفسها ادارتها سمعتها مش ولا بد ومديرها رخم اجمالا اهل اهناسيا مشهورين بالطيبه

سمسطا:وحداتها بعيده جدا وفي منها في الجبل اهلها طيبين جدا جدا جدا معرفش حاجه عن ادارتها بصراحه

الفشن و ببــــــــــــــــا: من الاخر متكتبوش الادارتين دول ومش هنتكلم علشان منغلطش في حد ان كان ولا بد يبقي الفشن ارحم بس ابعد اوى اللهم ان كنت من الصعيد يبقي هي اقربلك طبعا

كفر الشيخ

الاقرب لدمنهور هي دسوق بس وحدات دسوق مطرفه جدا وبعيده وتليها مطوبس وبرده وحداتها مطرفه بس مريحه والشغل فيها هادي ومدير الاداره راجل كويس جدا وبعدين فوه وعلي فكره فوه ومطوبس كانو اخدين اقل مجموع علي مستوي الجمهوريه قبل كده بس عموما ابتعدو عن اى مكان فى كفر الشيخ مديرية … قمة فى الغباء و البيروقراطية

محافظة الغربية

بالنسبه لمديرة الااداره د . ناديه العيسوى فهي حتة سكره وكانت بتتعامل معانا كوالده وليست رئيسه عمل عمري ما سمعت انها أذت حد علي الرغم من انها ناجحه جدا في مركزها تعامل الجميع بإحترام والجميع يحترمها وقبل ذلك يحبها مكتبها مفتوح دون وجود ساعى عليه و رقم موبايلها وتليفون مكتبها المباشر مع الكل وصدرها واسع لسماع الجميع بالنسبه لوكيل الاداره د . علي ذكريا فده راجل يتحط علي الجرح يطيب زي ما يبقولوا وإنسان محترم جدا والدكتور السعيد مزروع ذو الشخصيه القويه الحازمه صاحب البنيه القويه عندما تراه أول مره تهابه ولكنه يحظي بإحترام الجميع لانه لا يظلم احد كانوا لما يجي لنا حد منهم تفتيش الوحده كنا بنحس ان حد من قرايبنا جاي يزورنا وكانت الممرضات تتسابق في تقديم واجب الضيافه حبا وليس نفاقا او خوفا ولكن دوام الحال من المحال ولا احد يضمن استمرارهم في مناصبهم لأن السيئ هو الذي يبقي والجيد بيضيعوه في البلد دي بصراحه عمر ما حد غلس علينا من الادارة والحالات القليله التي كانت تأخذ جزاءات من الاداره كانت تستحقها بإعترافهم نفسهم كانو اما يعرفوا ان فيه تفتيش من خارج الاداره يتصلو بينا يبلغونا اى نعم احنا لما تكون مستعدين وكويسين ده حلو في وش الاداره بس برضو ده فيه فايده لينا إن ماحدش مننا يأخذ جزا اما من خارج الاداره فوقاكم الله شرهم كل التغليس كان بيجي منهم ( مديريه _ مجلس محلي _ محافظه _ وزاره )

المحلة الكبري

منقسمة الي ادارتين

ادارة المحلة أول وتاني احسنهم ادارة المحلة تاني مدير ادارتها راجل طيب ومسالم مش بتاع تحكمات ومشاكل بعكس ادارة المحلة اول الدكتورة اللي ماسكاها شديدة اوي ومحدش بيشكر فيها بالنسبة لمستشفيات التكامل التابعة ليها

مستشفي تكامل العامرية

صفط تراب

الهياتم

وتقريبا الدواخلية مستشفي تكامل

بالنسبة للوحدات التابعة ليها
اذكر منهم

بلقينا
شبرا ملكان(مفيش سهر)
عياش
شبرا بابل(مفيش سهر)
كفر فيلة
عزبة راغب(مفيش سهر)
سندسيس
كفر دمتنو
نمرة البصل(اقرب لكفر الشيخ منها للمحلة)
كفر حجازي

معظم الوحدات ومستشفيات التكامل اللي ذكرتها لك مواصلاتها سهلة الحمد لله ومتوفرة ومعظمها بتركبيه من موقف واحد.. انا مسمعتش عن اى شكوى غير من مركزين بسيون وقطور طبعا افضل المراكز على ما سمعت هو طنطا تانى ثم طنطا اول بالنسبه لمركز قطور  فيه فهو واخد سمعه كبيره شوبه لكنه مش سئ للدرجه  مشكلته الوحيده المرور الكتير وان مدير الاداره من محبى الواسطه والمحسوبيه

يعنى لو معاك واسطه هتبقى ملك ولا جزا ولا غيره حتى لو مرور هيغطيك بنفسه كذلك فى التوزيع لو معاك واسطه هيوديك احسن مستشفى تكامل حتى لو فيها 10 أطباء ولو ممعاكش يبقى وحده صحيه حتى لو هتشيلها لوحدك 7 ايام بس هو كشخص طيب وبالالحاح عليه بيبقى كويس وبالخبره ممكن تمشى امورك وتتعرف على المفتشين الماليين والاداريين وتاخد وضعك كذلك ادارة السنطه وزفتى زمايلى كتير شكروا فيها بل ان ليا زمايل فى ادارة زفتى كانوا بيقولوا ان المرور بيبلغهم قبل ما يروح الخلاصه ان الغربيه نسبيا من المحافظات الكويسه فى التكليف أفضل الادارات طنطا تانى ثم أول ثم زفتى ثم المحله أول وتانى ثم السنطه ثم كفر الزيات ثم سمنود ثم قطور ثم بسيون

كفر الزيات

بص يادكتور الاماكن القريبه من طنطا كفر الشوربجى بس دى وحده جديده دىبس الى على الطريق مش لازم تركب اكتر من مواصله اما ابو الغر دى مستشفى تكامل فى قرى جنب ابو الغر بردو بس وحدات بس دى لازم تنزل كفر الزيات الاول وبعدين تركب مواصلاتهم فى مستشفى تكامل الدلجمون دى بيقولوا كويسه منشيه سليمان ودلبشان دول مستشفيات تكامل فى قرى تانيه ممكن اسال لحضرتك عليها بس اعتقد انها كلها وحدات على العموم الى سمعته من صحباتى انك ممكن تغير من مكان لمكان وكمان لما بتسال فى اداره الشؤن الصحيه بتعرف ايه الاماكن المتاحه النسبه للقرى اللى جامب كفر الزيات وقريبه من طنطا زى ما قالنا لحضرتك كفر الشوربجى ودى على الطريق مش حتحتاج الا لمواصله واحده واعتقد ان دى اتملت خلاص وفى كمان بيار ودى من طنطا على طول وفى مستشفى تكامل الدلجمون بس اللى اعرفه ان لازم الالتزام بالحضور فيها دايما ودى حتنزل الاول كفر الزيات وبعد كده حتركب لها مواصله مش حتكمل خمس دقايق ودلبشان وكفر حشاد حتركب لهم من موقف كفر الزيات برده بس كويسين وعلى الطريق ولما تيجى يا دكتور ادارة كفر الزيات عرف مدير الاداره انك من طنطا وهو بيبقى عارف الاماكن كلها واذا كانت مستشفى تكامل ولا وحده وايه الاماكن اللى فاضله وعلى فكره يا دكتور الواسطه حتدخلك اى مكان عاوزه حتى ولو كان اتملى.

محافظه الدقهليه

محافظه كبيره وفيها العديد من المراكز:
• المنزلة
• الجمالية
• دكرنس
• ميت غمر
• أجا
• طلخا
• بلقاس
• السنبلاوين
• شربين
• المنصورة
• منية النصر
• بنى عبيد
• ميت سلسيل
• تمى الأمديد
• المطرية

مبدئيا كده وصف الطريق من القاهرة و بعد المسافات لو انت طالع من القاهره باتجاه مدينة المنصوره ستقابل شبرا ثم قليوب ثم قها ثم طوخ ثم بنها ثم كفر شكر ثم ميت غمر ثم اجا ثم المنصوره وطلخا ثم  نبروه طبعا نبدأ بالعاصمه اللي هي المنصوره بديهي انها محط الانظار وموضع الجامعه والمديريه تبعد ساعتين عن القاهره صعب جدا جدا ان حد يتكلف فيها ومن الاخر وكيل الوزاره بيطلع قرار ممنوع التوزيع في المنصوره وطلخا مقفولين تماما ده حتى احنا كنواب صعب نتوزع هناك الا بواسطه محترمه وبعد المنصوره نتكلم عن طلخا طلخا لا تبعد عن المنصوره سوي خمس دقايق بالسرفيس فهي تعتبر جزء من المنصوره أيضا صعب التكليف فيها وان لم يكن بنفس صعوبه المنصوره منصوره وطلخا لو اتكلفت فيهم يبقي كويس لكن صعب جدا ولذلك انساهم تماما ميت غمر بيفضلوها بتوع القاهره لقربها من القاهره وكمان اداره مش وحشه يلي ميت غمر في القرب من القاهره هي اداره اجا وهي اختيار نموذجي يعني اصحابنا اللي اتوزعوا هناك كانو زي الفل طبعا اتفقنا انك مش هتروح حتت زي المنزله والجماليه وميت سلسيل لانهم اولا بعاد عن المنصوره تحس اساسا انهم خارج المحافظه وثانيا لان اللي هيروح هناك صعب جدا يتحرك لان مش عليهم اقبال اساسا ابناء الدقهليه بيجيبوا واسطات عشان يهربوا منهم

بعد كده نتكلم عن بلقاس والسنبلاوين : بلقاس تبعد عن المنصوره نص ساعه بس وهي اختيار كويس لمن لم يستطع ان يلحق بالمنصوره وطلخا وميت غمر واجا مدير الاداره بتاعها راجل كويس ومرن وممكن تتكلم وتاخد وتدي معاه هناك و بيجي يومين بس في الاسبوع هي تابع ليها قري كتير واللي يروح هناك يقولي وانا اقوله بالتفصيل عن افضل القري هناك بالنسبه للسنبلاوين فأسمع ان مدير ادارتها متشدد لدرجه ان واحد زميلي  حول هناك  ولكن من رخامه الوضع هناك رجع تاني ههههههه اه والله لان تابع ليها وحداااااااااااات كتتيرررررررررره

دكرنس
تبعد نص ساعة عن المنصورة…القرى بتاعتها فى منها جنب المنصورة يعنى ممكن ربع ساعة من المنصورة تبتدى القرى بتاعة دكرنس…اكيد كمان فى بعد دكرنس قرى تباعها بيتهيالى ادارة كويسة….بيراعوا الاغراب يعنى..وفلوسها كمان كويسة ..يعنى الحوافز بتتاخد عادى ادارة منية النصر على بعد ساعة الا ربع من المنصورة…اسمع انها ادارة ربنا اللى يعلم بيها اسمع انهم صعبين شوية
ادارة ميت سلسيل…على بعد ساعة من المنصورة…اصحابى مش بيشتكوا منها ادارة الجمالية…اسمع انها ادارة محترمة على بعد ساعة وربع من المنصورة ادارة المنزلة… على بعد ساعة وتلت من المنصورة…..بس مشكلتهم انهم علشان بعيد فدايما عندهم عجز فى الاطباء فممكن كل شوية يودوكوا فى وحدة بيفسحوكوا يعنى وبتبقى مشكلة علشان حد يخلى او يبدل او الكلام دة يعنى اللى بيروح هناك هيلزق استحالة يستغنوا عنه (فى ميت سلسيل والجمالية والمنزلة والمطرية) و عموما شباب الدقهلية المفروض يكتبوا الزرقا وكفر سعد (دول تبع محافظة دمياط) قبل ميت سلسيل والجمالية والمنزلة والمطرية(ودول تبع محافظة الدقهلية

محافظة القاهرة

فيها حاجتين مهمين اولا الانضباط في الشغل يعني تقريبا كل يوم هتنزل الشغل التفتيش كتير جدا الصبح وفي النبطشيات حتى في السهر كمان بالنسبه للفلوس فعادة مش بتتاخر بس التقييم 100% بس مش 250 زى باقي المحافظات القاهره عموما كلها مراكز مش وحدات والعدد بيكون كويس وفي دكاتره كتير اكبر مننا

الادارات

اولا في ادارات صعب قوي تتكلف فيها الا لو ليك واسطة جامدة او مجموعك عالي جدا ودي زي مصر الجديدة – مدينة نصر – النزهه باقي الادارات مش بتختلف كتير لذا من راي ترتبوهم حسب الموصلات مش شرط الاقرب جغرافيا لان ممكن تكون قريبه بس مواصلاتها مش حلوة وتركب اكتر من حاجة مثلا مدينة السلام تعتبر بعييدة بس مواصلاتها كويسه لكل سكان مدينه نصر والنزهه وشيراتون المراكز هناك كويسة جدا جديدة ونظيفه بس المترددين عليها صعبين نوعا ما يعني يتخانقو علي اي حاجه إدارات عين شمس والمطريه كويسين والزيتون بيشكره فيها اوي الزاويه والوايلي نص ونص منشية ناصر والمقطم اللي اعرفه ان فيهم مراكز في اماكن صعبه والناس مش كويسين فيها بس في مراكز كويس في اماكن حلوة اداره بولاق ابو العلا الادارة دى فيها 3 وحدات رعاية أساسية

1-المركز الصحى العام بشارع الصحافة و دة أحسنهم

2-مركز رعاية الطفل برملة بولاق و يقع بالقرب من روض الفرج 3-المركز الصحى الحضرى بالجلاء ودة أسوأهم و مكتبين صحة بولاق أول داخل المركز الصحى العام بولاق ثانى بجوار مستشفى بولاق وراء أركاديا مول والحضور يوميا فى كل الأماكن ولا يمكن التزويغ نهائيا لأن التفتيش كتير و لكن الشغل و النوبتجيات مش كتير على فكرة ادارة بولاق نفسها فى الدور التاسع بمجمع التحرير

إدارة الخليفه والمقطم
عندك أربع أماكن
1- مركز طبي القلعه
2- مركز طبي التونسي الجديد “الحضري”
3- مركز طبي المقطم
4- مركز طبي التونسي القديم ” اتنقل إلي مكتب الصحه ” عشان بيتجدد
الترتيب ده إللي انت تستميت عشان تروحه
في كل حاجه
إنما حته التزويغ دي ما حدش يضمنهالك
الأربعه فيهم خنقه
أفضلهم من ناحيه التزويغ التونسي الحضري
أفضلهم من ناحية النظافه والشياكه والمواصلات وكل حاجه يبقي القلعه

بس إنسي التزويغ في القلعه إنسي المقطم ماسكاه مديره واحده ست وينطبق فعلا عليهم المثل اللي بيقول ” هلك قوم تحكمهم امرأه” بس مكتب الصحه بلاش تروحه

محافظة شمال سيناء
إدارة نخل
, لازم تعرف انها في وسط سيناء , يعني ارض الخمر والحشيش والقمر , اه وبالمره السلاح اما عن الاقامه مريحة جدا لأن مفيش حد هيزعجك نهائي طول مانت لسه حي ترزق , ولو نشتك طلقة طايشة او حتي مش طايشة محد ش هيزعجك علي اعتبارانك مت بقي. اما عن الفلوس فدي متعدش الناس هناك عرب ومعاهم فعلا فلوس كتير بس مش دي المشكله و المشكله انك تاخدها ودي بقي ازي مقدرش افيدك اما عن التعليم هتتعلم انك متعملش كده تاني وأول لما تروح بوس ايد ابوك وامك وازرع قراطين الارض اللي حداكوا وسيبك بقي من الطب ودوشته علي فكره المعلومات دي من واحد صاحبي تكليفه هناك في نخل برضه

محافظة المنوفية

الادارات : شبين الكوم , قويسنا , بركه السبع , الباجور , تلا , الشهداا ,  منوف , السادات , اشمون ,سرس الليان

معظم الادارات زى بعض ومفيش حاجه حلو او وحش طيب مااداره شبين  مدير الاداره مشهور بالانتدابات علاطووووول والى مش عاجبه يتنقل ماسمعتش عن اداره كويسه حتى الان زى الباجور والشهدا هاديه برضه ااما السادات بقى نووووم لكن مواصلاتها بعيده جدااا باقى ادارات المنوفيه زى بعض مفيش حلو وحش كله بيرجع لمدير الاداره بالنسبة للمسافات … اداره شبين فى الوسط ومحدش بيلحقها الا خريجى المنوفيه زوى المجاميع الخرافيه بعد كده فى اداره تلا وبركه السبع ودول قريبين لمحافظه الغربيه قويسنا ويقال اشمون قريبين للقاهره والجيزه السادات للبحيره

محافظة البحــــيرة

الاقرب لدمنهور طبعا الوحدات الي حواليها او مكتب الصحه فيها او مركز رعايه الامومه و الطفوله ف دمنهور نفسها عندك بقي ايتاي البارود وبعديها كوم حماده والمحموديه ووحدات المحموديه خفيفه وشغلها مريح بيروحو يوم ولا يومين معظم اصحابي هناك والرحمانيه وحدات البحيره عامه مريحه الدلنجات من افضل مراكز البحيرة اللى اعرفه ان مدير الادارة د/محمد كحلة من الناس المحترمين جدا المسافة بين الدلنجات واسكندرية ساعة او ساعة وربع بس فيه فى الدلنجات قرى كتييير جدا لدرجة ان فيه بعضها يبعد عن الدلنجات ساعة ونص واكتر المهم فيه اماكن اوعى تروحيها زى ابو سعيفة وابو مسعود و عزبة حمودة لو عاوزة تروحى ايام معينة روحى المسين فيها مستشفى تكامل او المركز الطبى او المستشفى بس عوزين واسطة اما لو عاوزة تعملى فلوس روحى الحسينى او الامام الغزالى المهم متروحيش مكان الا لما تسأليى عليه كويس

الدلنجات
تعتبر الدلنجات همزة وصل بين معظم مراكز البحيرة بينها وبين دمنهور 22 كم والطريق ف 20 دقيقة والاجرة 1.5 جم وبينها وبين مركز ايتاي البارود تقريبا 15 دقيقة بالعربية والاجرة 1جم وبينها وبين كوم حمادة نفس المسافة تقريبا والاجرة اقل من جم تقريبا
تقع الادارة الصحية ف قلب الدلنجات النابض ^_^ ومدير الادارة راجل سوبر محترم ربنا يجزيه خير ان شاء الله بيقدر حالة الاطباء وظروفهم والخبر ليس كالمعاينة ضم الدلنجات عدة وحدات صحية ومركز طبي ولا يحضرني عددهم وساقوم بتقسيمهم كالاتي
وحدات ع طريق دمنهور الدلنجات ( وهي محببة لمن هم خارج المركز )
وحدة ابو مسعود ( وحدة طب اسرة )
مستشفى التكامل بالمسين
وحدة ابو سعيفة ( وحدة طب اسرة )
وحدة درويش ( وحدة طب اسرة ومفندقة خمس نجوم )
***
وحدات ف طريق الدلنجات – ايتاي البارود
وحدة النوامين ( عيادة العمل للخامسة مساء )
وحدة كوم زمران ( وحدة طب اسرة )
وحدة جزاير عيسى ( وحدة طب اسرة )
****
وحدات ع طريق الدانجات – كوم حمادة
وحدة ابو صمادة ( يتم تجديدها )
وحدة زمران النخل ( داخلة لجوه شوية )

المركز نفسه به المركز الطبي و وحدة صحة عبود ( نظام العمل به حتى الساعة الخامسة وبه سكن ) لسه جديد وهو كان عيادة اصلا وبعدين بقا وحدات تانية معظمها فنادق خمس نجوم لانها جديدة وفيه وحدات نائية والكل بيتخانق عليها طبعا عشان البرايفيت هنذكر بعضها

وحدة نجع غرابيل ( وحدة طب اسرة ) ودي مواصلاتها اقرب لدمنهور
وحدة طيبة ( وحدة طب اسرة )
وحدة درشاي ( وحدة طب اسرة )
مستشفى التكامل بالوفائية
وحدة الجمالين ( وحدة طب اسرة )
وحدة مرمى سويد ( وحدة طب اسرة )
وحدة حمور الجديدة او العروبة
وحدة عزبة سالم ( وحدة طب اسرة )
طبعا كل وحدات طب الاسرة بها سكن ومحترمة جدا
وحدة رزافة ( مسقط راس مدير الرعاية الاساسية )

النظام زي اي مكان انت وزمايلك تظبطوا حالكم اهم شئ الشغل يمشي الدلنجات مفيهاش محطة قطار ولكن ممكن تروح منها لايتاي او دمنهور وتاخد القطار بينها وبين القاهرة من ساعتين لساعتين ونصف والاجرة 11 جم بمواصلات مباشرة بينها وبين الاسكندرية ساعة وتلت والاجرة 4 جم المواصلات شغالة 24 ساعة من المركز نفسه والتكاتك مخلتش حاجة طبعا قبل ما تروح اي وحدة بتعرف مواصلاتها ونظامها عن طريق التفاهم مع مدير الادارة او بسؤال زمايلك من وجهة نظري الشخصية مركز الدانجات مركز حي جدا ومش نائي ومعظم الوحدات التابعة له النظام المادي زي اي مكان والفلوس مبتتاخرش ولا شئ اللهم ف احوال معينة زي السنة المالية

التفتيش من الادارة المديرية مجلس المدينة المحافظة ( نادر جدا )

طاقم التفتيش محترم جدا بس بردوا ميبقاش 2 او 3 ف الوحدة ويروحاو يلاقوها مغلقة عايزينهم يعملوا ايه يعني لاكن اللي بيمشي شغله وينظمه محدش بيكلمه والحمد لله الحوافز كاملة

محافظة بورسعيد

بورسعيد من المديريات المريحة نسبيا خاصة بالنسبة للبنات كلهم بياخدوا تكليفهم فى المدينة نفسها او بورفؤاد مركز طبي المدينة كويس جداا وبيبقى فيه اعداد كويسة .. وفلوسة منتظمة .. وفيه مدير محترم ماسكه وهاتحضري يوم واحد او يومين بالكتير في الاسبوع كله ولو انتي من دمياط ممكن تروحي يوم تباتي هناك.. السكن مجهز جدا وفيه تمريض ستات بيباتو معاكي .. وتحضري عيادة تاني يوم .. وترجعي دمياط تاني ليا واحد صاحبي قضي تكليفه في المركز ده بالنظام ده بس لازم تعرفوا ان انكم ممكن تتوزعوا خارج بورسعيد زى بحر البقر والكاب اتجاه الاسماعيلية او المناصرة والجرابعة والديبة اتجاه دمياط والاماكن دى اى كلام للى عاوز يعيش فى مدينة عبارة عن تجمعات صيادين .بالنسبة للبرايفت مفيش داخل المدينة بس بحر البقر او المناصرة اللى عليها ضرب مااعتقدش ان الدكاترة اللى فيها هايخلوكم تشتغلوا معاهم فالللى مفيش معاه واسطة اعتقد انه هايروح اماكن تعبانة ومدير الرعاية الاساسية اسمه دكتور زكريا لو قولتله يمين هايوديك شمال بورسعيد المدينة مكانمريح للى عاوز يكبر بس مفيش فلوس ولا تعليم فلوسها شبه منتظمة .. التوزيع بكوسة من الحجم العائلي.. بيبقى فيه صعوبة لما بتيجي تخلي مفيش تفتيش تقريبا (على حسب كلام صديق لي) تبعد عن القاهرة حوالي ساعة ونص ومن مميزاتها ان مش فيه تطويح لان الوحدات مش كتير ومواصلاتها محترمة

محافظة حلوان

1- التوزيع داخل الأدأرة بيكون حسب التساهيل !! يعني لو في نقص عاجل في 15 مايو مثلا و نقص غير عاجل في التبين , فأول 3 او 4 دكاترة بيجوا يستلموا بيتبعتوا علي 15 مايو و هكذا .

2- حلوان منطقة شعبية جدا جدا (بأستثناء مكان واحد أو اثنين

3- في اماكن في حلوان تعتبر بعيدة جدا عن المترو مثل ( المثلث) .

4- في اماكن في حلوان موحشة جدا مثل (الكهربا) .

5- في اماكن في حلوان شيك جدا جدا مثل (حدائق حلوان و الست خضرة) .

6- في أماكن تقع قبل محطة مترو حلوان بخمس محطات مثل (المعصرة) .

7- مكان مديرية حلوان الصحية : تنزل من مترو الانفاق محطة حلوان , تتمشي في السوق شوية و تسأل علي عربيات (أطلس و المشروع ) و تركب العربية و تقوله ينزلك (الحميات) لأن مديرية حلوان الطبية موجودة حاليا داخل مستشفي الحميات.

8- مكان أدارة حلوان الصحية : تنزل من مترو الانفاق محطة حلوان , تتمشي شوية و تسأل علي عربيات (مايو و التبين) و تقوله ينزلك المثلث , تنزل و تتمشي شوية شمال هتلاقي حاجة كدة عاملة زي مركز الشباب هيا دي مركز المثلث الطبي و بها أدارة حلوان الطبية .

منطقه الشروق وبدر الطبيه(سابقا)  الان انفصلوا الى ادارتى الشروق(بالشروق شارع البحر) وبدر (بمدينه بدر المركز الطبى) كانتا تتبعان مديريه الشؤن الصحيه بالقاهره الان تتبعان مديريه الشئون الصحيه بحلوان نبداء باداره بدر الطبيه
الان يتبعها مركزين طبيين(كانوا مركز واحد وحيد)
احدهما توجد بداخله اداره بدر (يعنى ليل نهار هيبقى وشك فى وش مدير الاداره يوميا قاعد على قلبك فى السكن)
والثانى بمساكن صبحى حسين(اسواء منطقه فى بدر من حيث طبيعه الناس اللى ساكنه هناك كان بيضرب بهم المثل فى سوء السلوك)

اهم العيوب
*المواصلات
هناك طريقتين للوصول اليها من رمسيس مباشره الى المدينه عبر طريق الاسماعيليه الصحراوى رحله تستغرق حوالى ساعه ونصف فى زحام خانق من موقف العاشر وهنا هتضطر انك تنتظر اتوبيس رقم 3.ممكن تقف ساعتين تلاته فى انتظاره وحين يلوح فى الافق شبح الاتوبيس تجد صراع شرس من اجل الحصول على مكان للوقوف بس هتقابل مشكله تانيه المسافه الى مدينه بدر من مدينه نصر تزيد على 50كم تقطعها ذهابا وايابا (على حسب تقدير زميلى القاطن فى مدينه نصر) و لم تكن هناك مشكله لان الحضور كان يـــــــــــــــــــــوم واحد فقط اسبوعيا تعقبه عياده تدوم الى الساعه12 فى اسواء الظروف بعدها تقبع فى بيتك بقيه الاسبوع
ملحوظه مشكله بعد المدينه عن وسط القاهره كان فى حد ذاته ميزه لان اى تفتيش كان بيفكر الف مره قبل ما يتهور وينزل يفتش على المركز الطبى وكانوا بعتمدوا على التليفون فى التفتيش(تفتيش من منازلهم) ملحوظه دلوقت الاداره فى سكن الاطباء داخل المركز الطبى يعنى تفتيش يومى اللهم قد بلغت اللهم فاشهد

العدد المحدود من اطباء التكليف الان بعد افتتاح المركز الطبى الثانى بمساكن صبحى حسين واخلاء اغلبنا للنيابات والجيش اصبح لايوجد فى المدينه كلها سوى 3 اطباء تكليف ملزمين بتغطيه مركزيين طبيين وسكان يربوا تعدادهم عن 100 الف نسمه ملحوظه بعد ايام سيبقى فى المدينه فقط طبيبين لان الثالث سيخلى للجيش أما عن السكن في شقه كامله بها كل الكماليات للطبيب النوبضجى فى المركز الطبى
الان تم احتلالها من قبل موظفى اداره بدر الطبيه تاركين فقط غرفه واحده للاطباء(من اصل اربع غرف ومطبخ وصالتين و 2 حمام)

نظام الحضور الان بسبب النقص الحاد فى عدد الاطباء اخر ما سمعته ان الاداره طلبت منهم الحضور 3 ايام فى المركز الطبى ومثلهم فى صبحى حسين(حتى لو انت من القاهره مش هتقدر تحضر يوميا لبعد المسافه كان افضل شىء فى بدر هو نظام الحضور بس من الممكن لو العدد زاد يرجعوا نظام الحضور السابق (تلات ايام عيادات او يوم نوبضجيه يعقبه عياده)

عدم وجود مستشفى فى المدينه حتى الان لا توجد مستشفى فى مدينه بدر بالرغم من العدد الكبير للسكان اقرب مشفى هى العاشر او السلام ودى عاوزه رحله طويله للخروج من المدينه والوصول اليها واساسا مفيش مواصلات داخليه سوى اتوبيس رقم 3 الشهير وده هيحطك فى مواقف صعبه الاسعاف دائما وكالعاده بتاتى متاخره(وبرده قدمنا شكوه جماعيه الى جهاز المدينه وطلب نقل الاسعاف الى داخل المركز الطبى وكان فى رفض من الاداره من اجل الحفاظ على سياسه التزويغ المتبعه)

اخر كلام انهم خلاص على وشك افتتاح مستشفى بدر الحكومى

المميزات

للاسف بعد انفصال محافظه حلوان عن القاهره وما تبعه من انفصال اداره الشروق عن شقيقتها بدر فان مميزات التكليف فى مدينه بدر(والتى كانت تنحصر فى حضور يوم واحد وحيد تتقاضى عليه بدل نوبضجيه من الجهاز يبلغ 50جنيها وتحصل بعدها على 3 ايام بدل راحه بقرار توافقى من مديريه الشئون بالقاهره وعدم مسؤليه عن اى شىء سوى اجراء الكشف وكتابه العلاج)
كل تلك المميزات اختفت لم يبق منها سوى انك لن تكون مسؤلا عن اى شئون اداريه
معك فى المركز 2 صيدلى يتناوبان العمل بالصيدليه على مدى الاسبوع ومديره مركز ونائبه لها يتوليان الشئون الاداريه وطبيبه صحه تتولى ما يختص بالمواليد والوفيات(بالمناسبه لو تم تكليفك فى بدر لا ترضخ للاغرآت الماديه التى يتقاضاها طبيب مكتب الصحه لسبب وجيه بلاش نذكره على العام هنا)
يعنى كل المطلوب منك انك تختار عياده وتقعد فيها تكشف على كام عيان وتروح

بقيه المميزات الماديه بتشمل
1*تعتبر مدينه بدر من المناطق النائيه وبالتالى يتقاضى الطبيب حافز ال200% الى جانب حافز ال150% وكل كام شهر بيقوم الجهاز بصرف مكافئه ماديه للاطباء لتشجيعهم على الحضور(ده عوضا عن بدل النوباضجيه التى اضطر الجهاز الى ايقافها بعد الموقف الشهير من مديره مديريه الشئون الصحيه بالقاهره وبلاش نخوض فى تفاصيله )
2*كل العاملين باداره الشروق وبدر الطبيه من النساء وده كان له ميزه كبيره على ايامنا انهم متعاطفات معنا(باستثناء شخصيه وحده او اتنين تطبق الروتين الحكومى بحذافيره على حسب حالتها المزاجيه )لكن الاغلبيه متعاطفه جدا جدا جدا بيحاولوا فى حدود امكانياتهم يجنبوك الجزائات

يبقى لكم اداره الشروق الطبيه
بسرعه كده هى نفس مميزات بدر وتزيد عليها ان نوعيه الناس فى الشروق (اغلبهم سكن ادارى اطباء وصيادله وفئات مثقفه اخرى عكس بدر
هناك اربعه مراكز طبيه

  1. مركز 63
  2. مركز المستقبل (اساسا ده مركز تنظيم اسره وما يعرف بالرائدات )
  3. مركز ال 100 متر (وده المركز الرئيس والاكبر فى المدينه)
  4. المركز الرابع مش فاكره

مواصلات الشروق اسهل واكتر لانها اقرب من بدر

  1. مركز ال100 متر قعدت فيه فتره هو نفسه مركز طبى بدر بس نائب المديره على ايامنا كان عليه تحفظات
  2. مركز ال63 متر اسمع من زميلى انهم كانوا بيطبقوا نفس نظام بدر فى الحضور والشغل ومتعاونين جدا
  3. مركز المستقبل لم اسمع عن احد اتكلف فيه(بس هو متميز بالصحه الانجابيه)

بالمناسبه
اولا:تقدر تتعلم استخدام وسائل تنظيم الاسره المختلفه من حبوب وتركيب لووب وكبسولات تحت الجلد وهنا لك حافز 20% تقريبا بس لن يصل الى يديك ما لم تطالب به

ثانيا:المفروض ان التكليف فى مدينه القاهره بيتبنى سياسه الدورات

  1. ثلاثه شهور تنظيم اسره
  2. ومثلهم اسعاف
  3. ومثلهم رعايه اوليه (اطفال وباطنى)
  4. ومثلهم مش فاكر ايه

يعنى تسع شهور فى المركز بتاعك وثلاثه فى الاسعاف اللى كان على ايامنا فى مركز الاسعاف فى 26يوليوا او ااى مركز اسعاف تانى

محافظة الشرقية

هي محافظة تبعد عن القاهرة مابين ساعة لساعتين حسب المكان الي جواها وفي المدن البعيدة حوالي تلات ساعات .. مواصلاتها للقاهرة كويسة ومتيسرة 24 ساعة وكيل الوزارة الدكتور: سيد ابو الخير .. راجل محترم الصراحة ومسمعتش انه عصلج مع حد فى حق ليه وبينصف الطبيب ضد جبروت مديري الادارات .. وبيدي نمرته لاي دكتور تكليف عشان يستقبل اي شكوى

الادارات

  1. ( الزقازيق ) العاصمة
  2. ديرب نجم
  3. أبو حماد
  4. الإبراهيمية
  5. (ههيا – ابو كبير – فاقوس – الحسينية ) دول 4 على خط واحد
  6. ( منيا القمح وبلبيس و مشتول السوق ) دول خط لوحدهم ( ناحية القاهرة )
  7. (ادارة كفر صقر و إدارة اولاد صقر ) خط لوحدهم

وأ بعد مدن الشرقية عن محافظة القاهرة مركز ابوكبير و كفر صقر و أولاد صقر و ابعد منهم فاقوس و ابعد منهم خااالص الحسينية و الصالحية … لأن كل المراكز دي في الشمال بينما القاهرة ناحية الجنوب من الشرقية بينما اقرب مدن الشرقية لمحافظة القاهرة هم منيا القمح ..من الطريق الزراعي المؤدي الى عبود في القاهرة … و بلبيس من ناحية الطريق الصحراوي المؤدي الى السلام و العبور… و مدينة مشتول السوق … ناحية مسطرد و هي اقرب مدن الشرقية للقاهرة 20 او 30 دقيقة من مسطرد

ادارة الزقازيق :بتاخد مجاميع عاليه عشان اوائل الدفعة في الجامعة بتكون هيه اول رغباتهم اللى ليهم بوست فى الجامعة وبعدين يقعدوا شهرين فى التكليف ويرجعوا يستلموا نيابة فى الجامعة فالاماكن بتفضى تانى وممكن تعمل بدل مع اى دكتور زميلك لية بوسط فى الجامعة قبل ما يخلى … بالنسبة التفتيش فيها بيبقى شديد عشان قرب المديرية والمحافظة واول حاجة بتيجى من الوزارة بتنزل عليها الاول يعنى هتحضر هتحضر الا لو كان معاك كذا دكتور أما المواصلات من القاهرة سهله وكويسة

ادارة ههيا ادارة كويسة وقراها مش متطوحة .. بس التفتيش عليها شديد شوية عشان قرب الزقازيق
ادارة ابو كبير كانت من الادارات الكويسة لكن حاليا ابو كبير اقذر ادارة فى الشرقية و مدير ديكتاتور معين مفتش لكل وحدة ومبيعترفوش بخطوط السير فى النوبتجيات والتشطيبات والخصومات على ودنه لذلك هى احسن ادارة فى نظر الوزارة

ديرب نجم ناس فلة وحبايبنا ومحترمين مع الكل بالذات الملتزم سواء من داخل البلد او خارجها

ادارة فاقوس بالتفصيل :
مدير ادارتها د/ محمد عبدالله راجل محترم ومابيحبش يئذي حد.. وفيها وحدات متطوحة جداااا .. وفيه وحدات قريبه .. يعني ممكن ممكن تروح اماكن مستريحة وومكن تروح اماكن مالهاش مواصلات

التفتيش فيها على حسب القرب من الادارة .. بعيدة عن القاهرة حوالي ساعتين لادارة فاقوس الواسطة هيه المحرك الاساسي في اي مكان .. لان مش مدير الادارة لوحده اللي بيمشي الامور .. عندك تلاته مهمين تحته هم اللي فعليا بيحركو الامور المدير المالي .. رئيس شئون العاملين .. شئون التنقلات فبالتالي .. الواسطة ليها دوور كبير معاك طبعا بيبقى صعب اوي تروح مكان كويس في الاول .. لان غصب عنه لازم يملى الوحدات البعيدة الاول .. لو سابها للوسايط هو اول واحد هاينضر فلازم تصبر لحد مالوحدات البعيدة تتملي الاول .. وبعد كده بيبقى سهل تروح اي مكان انت عايزه

بالنسبة لوحدات فاقوس .. ففيها اماكن متطوحة اوي .. وفيها اماكن قريبة

الوحدات اللي اوعى حد هناك يقنعك تروحها لان مالهاش مواصلات اساسا منفي يعني ..

  1. محمد علي
  2. كفر الاشقم
  3. العزازي الجديدة
  4. الخطارة

اوعى حد يقنعك تروحهم لانهم منفى

وفي وحدات بعييييدة ومواصلاتها غير ادمية

  1. جزيرة النص
  2. النحاسين
  3. النوافعة
  4. بني صريد

فيها بقى وحدات في المدينة نفسها ودي لصفوة الصوة

  1. وحدة كفر محمد اسماعيل
  2. مركز صحة المراه
  3. مكتب الصحة

فيه وحدات قريبة وكويسة

  1. الزاوية
  2. كفر شاويش
  3. البيروم ( عليها تفتيش جامد )
  4. الفدادنة ( تفتيش )
  5. النمروط ( فاتحة جديد )( مركز طب اسرة )
  6. الديدامون

فيه وحدات يعني ماتقدرش تقول عنها حلوة ولا ولا تقول وحشة

  1. سوادة
  2. العزازي
  3. الصالحية القديمة
  4. جهينة
  5. نعمان
  6. العرين
  7. الاخميين

مستشفيات تكامل زي :

  1. مستشفى الغزالي التكاملي
  2. مستشفى الهيصامية التكاملي
  3. مستشفى الروضة التكاملي
  4. مستشفى الصوالح التكاملي
  5. مستشفى قنتير التكاملي ( دي مش ماتكد منها )

وكل ده هايتلغى في 2010 وهايبقى مراكز طب اسرة
فيه مركز صحة واحد وصحة اتنين بالصالحية الجديدة .. وده بعيد اوي .. ومشوار وعليه تفتيش

و الشرقية عوما فيها 3 ادارات بعيد للي جاي من القاهرة
ادارة الحسينية: اياك اياك اياك ثم اياك .. الحسينية دي عذاااااااااب ومواصلاتها عذااااااااب ووحداتها في الجبال وفي بلاد تركب الافيال .. ناس من اللي هم لسه عايشين في عشرينات القرن الماضي
ومدير ادارتها صعب وبيذل …راجل رهيب .. هو طالع معاش قريب بس اللي بعده افظع منه .. الحسينيه فيها وحدات في الجبل .. اغلب وحداتها مالهاش مواصلات
فيه وحدات ممكن تركبلها اربع وخمس مواصلات
التفتيش عليها على حسب مزاج مدير الادارة ..
نصيحة .. للي من الشرقيه او خارجها .. ابعد عن ادارة الحسينية نهائي الحسنة الوحيدة اللي فيها ان فلوسها شبه منتظمة
ادارة اولاد صقر وادارة كفر صقر : من الادارات القريبة من محافظة الدقهليه .. اقرب للمحافظات الاخرى منها لمدن الشرقية ..
يعني اللي من الشرقية تبقى الادارتين دول اخر رغباته في المحافظة .. التفتيش عليها شبه يومي .. مدير ادارتها بتاع وسايط اوي .. حوافزها غير منتظمة .. وليا زمايل فيهم لسه مش خدو تقييم شهر 10 و11 و12 لحد دلوقتي

يعني من الآخر ( اولاد صقر ( مانصحكش بيها خالص لانها شبه الحسينة ومواصلاتها شبها ) ادارة منية القمح وادارة بلبيس …اقرب ادارتين للقاهرة .. دول على بعد من نص ساعة لساعة و منيا القمح زمايلى فيها بيقعدوا للساعة 10 فى النوبتجية وممكن واحد يمسك وحدتين ومدير الادارة شديد شوية و لو هترتب ادارات الشرقية من حيث الافضلية :

  1. الزقازيق
  2. ههيا
  3. الابراهيمية
  4. ابو كبير
  5. فاقوس
  6. منيا القمح
  7. ابو حماد
  8. وابـــــــــــــــــــعد عن
  9. الحسينية
  10. اولاد صقر
  11. كفر صقر

مدينة الطور

مستشفى الطور العام من المستشفيات الجيدة و مستشفى نظيفة جدا كمان ال flow فيها معقول مش هيقعد الدكتور يكلم نفسه طول الوقت مش عارف إذا كان الطور فيها وحدات صحية و لا لأ لكن لو وجدت فهي غالبًا مجهزة بالنسبة لمواصلاتها ففي كذا حاجة في سوبر جيت بيطلع من العباسية و ممكن من مصر الجديدة قصاد مستشفى مصر للطيران و ممكن ميكروباص من المرج و هو متوفر 24 ساعة لكن عيبه الوحيد إنك بتنتظر لحد ما يملا ركابه بالكامل قبل مايطلع فبالتالي ابعد عن أوقات الظهيرة في الصيف لأنك غالبا هتستنى كتير فأفضل الأوقات للسفر ليلاً طبعا صيفًا بالذات و عامة بالنسبة للسفر إيابًا أسهل بكتير إنه يكون بالميكروباص لأنك ببساطة بتروح الموقف و تعرف في حاجة طالعة دلوقتي و فاضل كام واحد و ممكن تحجز مكانك كمان و ترجع السكن لحد ما العدد يكمل و ممكن تخليه يعدي عليك قصاد السكن كمان خصوصًا لو كان معاك اتنين تلاتة
الطور كمدينة:
مدينة جميلة جدا جدا و نظيفة و منظمة و الحياة فيها حلوة و الناس هناك ودودة قوي و بسهولة ممكن تكون صداقات و معارف خصوصًا إن معظم أهل البلد اللي هتتعامل معاهم من المحافظات و خاصة الشرقية و السويس و بور سعيد و الإسماعيلية المدينة بالرغم من كونها نائية إلا إنها تحتوي على كل شيء ممكن تحتاجه أكثر منقطة حيوية في المدينة هي شارع المنشية و ما يجاوره و يحتوى محلات و صيدليات و سوق المدينة في المجمل هي مدينة تتحب فعلابعض الهيئات بتنزل اعلانات وبتكون عاوزة دكاترة تكليف بس بتشترط انك تستقيل من وزارة الصحة والهيئات دي هيا
{ مستشفيات وزارة الداخلية – السكة الحديد – النقل العام – مصر للطيران – مستشفيات الجيش …. إلخ }
مميزاتها
أولا المرتبات فيها أكتر من مرتبات وزراة الصحة دا أبل الزيادة في مرتبات أطباء التكليف الحالية يعني أنا فاكر انهم كانوا بياخدوا كل شهر 600 جنيه أو 700 زي مستشفي الشرطة كده ومصر للطيران أما مستشفيات السكة الحديد اعتقد المرتبات فيها اكتر

ثانيا ممكن تلاقي تعليم كويس اوي في بعض المستشفيات مش في كلهم زي مثلا مستشفي الشرطة في العجوزة او مستشفي قصر القبة العسكري

ثالثا ليهم حركة نيابات خاصة بيهم يعني في الغالب بعد ما بتخلص فترة التكليف ممكن بنسبة كبيرة جدا تاخد تخصص عندهم وتحضر علي حسابهم
رابعا هاتشتغل في مكان في الغالب بيكون نضيف يعني مش زي الوحدات الصحية
عيوبها
- انك ممكن بعد ما تخلص التكليف عندهم يقؤلوا ليك مع السلامة مش عاوزينك وده بيحصل بس نادر وطبعا انت استقلت من وزارة الصحة فاهاتلاقي نفسك في الشارع
- انك ممكن ماتاخدشي التخصص اللي انت عاوزه لانه الاماكن هناك محدودة

الطريق الثالث انك تقدم في أكاديمية الجيش أو أكاديمية الشرطة هاتلاقي اعلان نزل من الجيش والشرطة بعد ظهور نتيجة الثانوية العامة وهاتقدم مع اللي هايقدموا الي كلية الشرطة او الحربية وهاتسحب نفس الملف وعاوزين أطباء علشان يتخرجوا بعد ست شهور في الاكاديمية علي رتبة ملازم أول طبيب لو عاوز تقدم هاتسحب ملف وتملا البيانات وتقدم الملف وتمتحن امتحان القدرات بعد كده تجتاز امتحان الرياضة بعد كده الكشف الطبي
بعد كده امتحان الهيئة
مميزاتها
- انك في الغالب هاتتعلم كويس أوي لانه مستشفيات الجيش نضيفة جدا وغالبا الشرطة كذلك – هاتعلق نجمتين جنبه الهلال يعني دكتور وظابط والحاجة دي بيحبها الناس اللي بتحب المظاهر وهاتقدر تعمل علاقات حلوة ومع الوقت هايكون ليك سلطة خصوصا لو دخلت اكاديمية الشرطة – المرتب بتاعها برده أعلي من وزارة الصحة أبل الزيادة الحالية لاطباء الصحة – فيه ميزة حلوة أوي خصوصا في مستشفيات الجيش انك تقدر تحضر دكتوراة علي حسابهم او زمالة اجنبيه – هايكون ليك جميع الحقوق والمزايا التي يعامل بها ظابط الشرطة او ظابط الجيش

عيوبها

- انك بتتعامل كظابط الاول ثم كطبيب يعني انك هاتكون محكوم بقوانين العسكرية أو الداخلية يعني من الاخر كبت للحرية- انك مش ضامن تتوزع فين يعني ممكن تروح وحدة عسكرية في الصحرا لو تبع الجيش او تروح تشتغل طبيب في سجن لو تبع الشرطة الا اذا كان معاك واسطة جامدة هاتروح مكان كويس
- هاتفضل طول عمرك تتنقل من محافظة للتانية في حركة التنقلات اللي بتحصل كل شويه يعني النهاردة انت في القاهرة بكره في مستشفي قنا العسكري
- مش هاتقدر تفتح عيادة غير بعد الدكتوراه او الزمالة يعني بعد ما تبقي مقدم
- لو دخلت وحبيت تستقيل يبقي لازم تدفع بتاع 50 الف جنيه تعويض ليهم أو تستقيل من غير ما تدفع اي حاجة بس بعد ما تاخد رتبة رائد

About these ads

نبذة dr3mro
Just a googler

التعليقات مغلقة.

Follow

Get every new post delivered to your Inbox.

Join 103 other followers

%d bloggers like this: